De Wiehnachtsmann

Is ja man blots goot, dat wi nich in Ingland levt. Worüm? Dat will ik di vertellen. Heff ik doch jetzt leest un ok höört, dat in Ingland en Preester bi en Wiehnachtsfier de lüttjen Gören – se weren so üm de fief Johren oolt – verklort, dat dat gor keen Wiehnachtsmann gifft! Un sowat jüst vör dat gröttste Fest vun de Christen in’t Johr. He vertell, dat de Wetenschop dat ok bewiesen kann.

De Wiehnachtsmann mutt an Hilligavend 378 Millionen Gaven an 92 Millionen Familien utdelen. Dorför brukt he eenundörtig Stünnen un he fohrt mit sien Rendeerten dreedusend mol fixer as de Schall! Nu hett aver keen Dag mehr as veeruntwintig Stünnen un so kann he dat nienich wuppen. Un denn weer he al lang doot vun wegen de Anziehungskraft vun uns Eerd!

So, do harr de Preester man wat vertellt! De Lüttjen blarrt un quarkt, wat dat Tüüch höllt, ehr Öllern weren fuchtig un harrn schimpt.

As ik de Tallen lest, erinner ik mi. Vör Johren harrn Studenten vun en düütsche Universität dat al utrekent mit Mathematik un Physik. Dat weren prick de sülven Tallen un noch en poor mehr. De Sleden woog so üm de achthunnertdusend Tünnen un dorför brukst du över tweehunnertdusend Beesten, de em treckt. Un dat Best hett de Biologie rutfunnen: keeneen Rendeer kann flegen, ok nich Rudolph!

De Studenten harrn dat as Spaaß rutgeven un dormit bewiesen, wat se allens mit de Wetenschop anstellen künnt. Aver dat nu en Preester dat lüttje Gören vertellt un nich markt, dat de Kinner för so en Jux noch veel to lütt sünd, is trurig.

To en Wiehnachtsfest hört dorto, dat jüst de Kinner jümmers noch an de Wiehnachtsmann glöven. Un so lang se noch glöven köönt, is ehr Kinnertiet noch nich vörbi. De hele Adventstiet stüert se op dat groote Fest hen. Un wi, de wi nu man nich mehr so jung sünd, hebbt unse Freud do an, wenn wi dat Lüchten in de Kinneroogen seht, wat se opregt sünd un sik an Enn högt.

Mit de Wetenschop kannst du allens bewiesen, villicht ok männichmal en Droom in Dutt hauen un de Gloven dörch Weten ersetten. Aver mut dat denn jümmers sien?

Mit de Wiehnachtsmann regelt sik dat vun ganz alleen, wenn dien Sprössling markt, dat de dicke Keerl mit de rode Antog un de witte Boort de Schoh vun sien Vadder anhett or mit de Stimm vun sien Naver snackt!

Aver so lang : nehmt de Kinner ehr Gloven nich weg!

Manfred A. Sahm

Von Manfred A. Sahm ist kürzlich  das Buch „Till Ulenspegel op Platt“ erschienen. Es enthält 96 Abenteuer und Streiche des berühmten Schelms, die er ins Niederdeutsche übersetzt hat. Das 306 Seiten starke Buch ist zudem mit Holzschnitten illustriert und kann als Paperback (ISBN 978-3-7439-6106-7, 11,99 Euro), Hardcover (ISBN 978-3-7439-6107-4, 20,99 Euro) und e-book (ISBN 978-3-7439-6108-1) bestellt werden.

Print Friendly, PDF & Email
KulturportalStiftung Hzgt. LauenburgKulturSommerKontaktImpressum