Wiehnachten in´t Holt

En feine Aart, op dat Christkind to töven, heff ik fröher mal mit mien egen Kinner utprobeert. Bi en Spazeertour dörch dat „Hoge Holt“ hebbt wi enen feinen halvwussen Dannenboom funnen un em eerstmal düchtig bewunnert. Keen beten scheef weer he, alle Twiegen schöön graad utstreckt stünn he en beten af vun de annern Bööm an den Wegrand, rundüm leeg en gröne Grasteppich.

Man, wat kunn de utputzt staatsch utsehn!

Un weckereen sall em denn bewunnern?

Un wokeen sall em utstaffeern, un womit?

Un gau harrn wi enen Plaan maakt.

Sünnavend vör den 1. Advent güng uns Spazeertour wedder to den Boom un he kreeg sülvern Lametta opleggt. Den nächsten Sünnavend kemen en paar Kugeln darto. Un as dat ümmer neger op Wiehnachten to güng, nehmen wi söte Kringeln mit. Al  bi´t Ophängen freuen wi uns över de nächsten Spazeergängers, de sik woll wunnern würrn.

Endlich, kort vör Christavend, dachen wi ok an de Deerten. Do kemen Wörteln un Appeln in unse Taschen, de leggten wi in´t Gras, en paar Meschenknödels  hungen wi noch in de Twiegen, blots Lichten geev dat keen, de kunnen je nich ahn Opsicht ansteckt warrn.

Un denn hebbt wi  to Huus Wiehnachten fieert, harrn Besöök un kemen eerst in´t niege Jahr wedder to „unsen“ Boom.

He stünn ebenso stolt as vör Advent, harr Ruuchriep op de Twiegen, man allens annere weer afputzt, de Boom weer plünnert, as wi so seggt.

Fein, dat hett uns gefollen, do hebbt sik also noch mehr Lüüd un woll ok Deerten över unsen lütten Dannenboom freut!

Helga Walsemann

Print Friendly, PDF & Email
KulturportalStiftung Hzgt. LauenburgKulturSommerKontakt