Töverkraam

De Daag twüschen de Johren sünd heel besünners. As wöör de Tiet de Huut wesseln. Vun düsse magische Week, de nich mehr dat ole un dat nie’e Johr noch nich is, sünd en ganzen Dutt averglöövsche Geschichten överbleven. As weer in de Daag twüschen Wiehnachten un Niejohr de Wand twüschen Wirklichkeit un Töverkraam dünner as sünst. As wenn dor wat insickern dee in uns Alldag, dat wi anners buten hollen doot.

Bi uns in’n Noorden vertellt se sik de Geschicht vun Wotans Rieder, de sik in de Wäsche verfangen un hangen blieven doot. Dorwegen schall een se twüschen de Johren ok nich an de Lien ophangen. Wobi mi dat al as Kind nieschierig maakt hett – to geern harr ik maal so’n Rudel wille Germanenkrieger, de sik mang uns Ünnerbüxen verheddert harr, bi de Büx kregen.

In Spanien schall een de Wäsche ok nich opbummeln, sünnern antrecken, un twoors rode to Silvester. Dat nämlich hölpt denn över’t tokamen Johr de Leevde op de Fööt, seggt se. Dorbi will een natürlich keen Risiko ingahn un maakt dat lever, datt du di achteran tominnst in düsse Hensicht nix vörtosmieten hest.

Bliegeten is Spökenkieken för Anfänger un harde Skeptiker. Ok Lüüd, de dat ganze Johr över an reinweg gor nix glöven doot, knickt to Silvester bi’t Bliegeten in. Denn sünd se sik nich mehr so seker vunwegen Geld, Karriere un Leevde, wenn dat Metall spreken deit.

Bi mi suer aver verleden Silvester dreemal achter’nanner en Lee (Sense) rut. Wi hebbt denn nakeken in dat Verkloor-Book. Dor hebbt se versöcht to beruhigen un rümeiert vunwegen „nie’e Anfang“ un „Scheitern as Schangs“ un so’n Tüünkraam. Dorbi weet doch jeder, wat Sense heten deit: Sluss, Enn, ut! Dorüm heff ik dat düssen Ooltjohrsavend nu ok heel un deel blieven laten mit‘ Bliegeten un eenfach teihn Berliner un ´n Buddel Sekt verneiht. Dorvun hest denn achteran ok Buukkniepen, aver tominnst weetst du worüm.

Print Friendly, PDF & Email
KulturportalStiftung Hzgt. LauenburgKulturSommerKontaktImpressum