De Geometer un de Buer

De Buern in uns Land twüschen de Meren, twüschen de Noordsee op de ene Siet un de Oostsee op de annere, hebbt all sture Köpp, so seggt man. Annersiets sünd se swienplietsch, so as dat ok „buernslau“ nöömt ward. Un sünnerliche Dickköpp leevt tomehrst an de westliche Waterkant, to’n Bispeel in Dithmarschen. Wenn du de Geschicht glöven dörvts, is dat siet Johrhunnerten so. De Buern holt sik torüch, wat se nich wüllt, dat wüllt se nich und wat se nich kennt, dat freet se nich.

Dat ist nu all en lang Tiet her, do schull dor en Iesenbahn buut warrn. En Geometer harr den Opdrag, dat Land un de Streek to vermeten. Man – de Buern wullen nix mit de Saak to doon hebben un wullen ok keen Stück vun ehr Land hergeven. Iesenbahn? Bruukt wi nich!!

An en schöön Morgen, as de ole Buer Harms sien Veeh bekieken wull, süht he en Geometer op de Ossenweid stahn un dörch sien Rohr kieken. Füünsch geiht he to den Keerl un fraagt em:

„Wat wullt du hier?!“

De Geometer wiest em sein Utwies un vertellt, dat he de Streek för die niege Iesenbahn vermeten deit un he dörv mit Verlööf vun’t Amt op dat Land stahn. Gegen „schreven Schrift“ op so’n Schien is Buer Harms argdenkern; he weet, dat dat nix bringt, veel Wöör to maken, un so lött he em ahn Antwoort stahn.

He stappt to sien Huus un is fuchtig, dat he de Geometer nich so eenfach vun sien egen  Land smieten kann. Ünnerwegens brabbelt he denn ok en poor mal vör sik hen:

„Dunnerslag! Tööv, man, di Keerl vun’t Amt will ik woll kregen!“

To Huus geiht he stracks in sien Stall un lött de Bull rut op de Weid, wo de Geometer jümmers noch an’t arbeiden is. De Bull hett de Mannsminsch kuum sehn, do geiht dat ok al tokehr! He rast los, de Steert hooch in de Luft. De arme Geometer lött allens stahn un liggen un rennt, as he sien Leevdaag noch nich rennt is, in en grooten Bagen op dat Huus to. As he nu dicht bi is, kümmt Buer Harms ut de Döör un röppt em mit en unschüllig Gesicht to:

„Wies em doch dien Schien, wies em doch dien Schien!“

Print Friendly, PDF & Email
KulturportalStiftung Hzgt. LauenburgKulturSommerKontakt