Fastentiet

Dor sünd se wedder, de söven Wochen ohne. Ohne wat kann sick jedeen sülvst utsöken. Dat sall je wat sien, wat so`n beten Herr över een worrn is. Villicht de Schokolad oder dat Kiekschapp oder maag sien de Computer. Wenn de för de Arbeit nutzt ward, let sick dat je nich ännern. Över wenn een denn ok noch soveel  friee Tied vör tobringt, denn is dat meist `n beten toveel.  Anfungen het dat je ganz anners. De Mann und de Kinner hebbt doran sedden und kunnen keen End bi finnen. „Kann doch nich angahn,  dat een sien  ganze Tied för so en Ding tobringt, dat noch nich mal Antwort gifft, wenn een wat dorto seggt.  Nu stell doch af dat Ding, heff all dreemal to`n Eten raupen und nüms kümmt.“ „Ach, du sullst dat man sülven mal versööken, maakt würklich Spaß.“  Und wenn en Spill to End gahn is, denn fraagt di de Kassen forts, ob du nich noch en niedet spelen willst. Denn hebbt dien Fingers all op ja drückt eirer du die versühst. Blots noch eenmal , dat schall doch mal glücken, dissen Kassen ünner to kriegen. Und so geiht de Tied dorbi hen. Markst dat reinweg gor nich. Kiekst op de Klock, denkst, dat kann doch gor nich sien, allwedder en Stunn verdaddelt. Und denn ward dat Tied dor wat gegen to daun, dor villicht op to verzichten för de Fastentiet. Und wat sünd schon söven Wochen, de sünd doch fix vörbi. Und mitins hest wedder Tied en Book to lesen oder en beten to telefonieren, de Stoppwäsche aftoarbeiten oder eenfach mal aftohängen , wi de Jungen seggt. Und bautz sünd se üm, de söven Wochen, de swore Tiet liggt achter een. Ach wat is dat ierste Stück Schokolad na de Fastentied för en Genuss. Und mit den Rekner, dat sall nu anners warrn! Nur noch dree Spille achterrad, denn ward utstellt – oder machen Sie noch ein Spiel???

Print Friendly, PDF & Email