Naturfan

Ik bün dörch un dörch Naturfründ. Dat kannst‘ aver glöven. Jeedeen Minut, de ik ut mien Tietplaan afkniepen kann, rönn ik na buten. Natur is mi allens! Dor kann ik richtig optanken un de Seel bummeln laten. Aver nich as so ´n armseligen Anfänger: Rucksack achtern op un denn geiht‘ loos. An’n besten noch op Sandalen! Nee, nee, ahn de richtige Utrüsten geiht bi mi gor nix. Du föhrst jo ok nich mit Shorts un Tennissocken op’n Winterdag na Lappland. Dat fangt bi de Schoh al an. Ik heff Wannerschoh mit ´n Orthopädie-Inlay. Un in de Sohl inarbeidt is ´n „Känguru-Membran“. Nu musst du di vörstellen, de feddert nich bloots den Opprall af, wenn du mit dien Fööt op’n Footbodden kümmst. Dat is jo goot, datt du di nich de Gelenkens twei maken deist. Man dat sünd dat olle Kamellen. Nee, bi mien Schoh jumpst du bi jeedeen Pedd meist vun sülvst so´n poor Meter hooch dörch de Luft. De hebbt en Butenhuut as en Torpedo, gegen den Luftwedderstand, weetst, wat ik meen? Denn kaamt de Loopbüxen. Wenn ik de armen Stakels seh, de so ´n schetterige Joggingbüx ut griesen verwuschen Boomwullstoff üm de Been to slabbern hebbt! Dat deit mi richtig in de Seel weh. De Kledaasch süht ut as en Sack.  Dat Sackgeföhl krüppt denn vun de Saken op den Dräger över. An’t Enn dücht di de ganze Minsch as’n Sack. Dat is doch keen Leven, keen minschenwördig Existenz. Ik segg jümmers: Natur beleven is en ästhetischet Präseer. Aver dat is jo keen Inbahnstraat. De Natur beleevt di ok! Nich blots de anner Naturfrünnen, ok Poggen, de di vörbilopen seht, Rehe, Kaninken… . Wat schüllt de denn seggen: De Kroon vun de Schöpfung slarrt as en Dutt griesen Plünn an di vörbi? Nee, nich mit mi. Mien Büxen sünd mit Titan-Draht ut de Weltruumforschung starker maakt, föhlst di an de Oberschenkel as ´n Raket mit. Ik heff ´n automaatschen Peddenteller, bi mi geiht keen Schridd verloren. Hartfrequenz- un Pulsmeter is jo Standard. Man bi mi warrt all teihn Minuten ok de Blootzucker meten. Bööm, Deerten, Wischen? Nee, Bööm, Deerten, Wischen seh ik ünnerwegs natürlich nich. Dat geiht nich mit de 3D-Simulatschoonsbrill. Ik bün jo buten nich as Halfwille ünnerwegens.

.

Print Friendly, PDF & Email