Wo büst du?

„Wo büst du?“ is jüst de Fraag, de in Düütschland an’n meisten stellt warrt. Dunnerwedder, dinkst du, wat ´n deepdinkern Volk! Dat is jo reinweg Existenzphilosophie: „Wo steihst du in’t Leven?“ Oder röppt dor een midden in de piekendüstere Nacht ´n vertwiefelt: „Wo büst du?“ Villicht speelt de Düütschen ok besünners intensiv un bit in’t hoge Öller „Blinne Koh“. Nee, „Wo büst du?“ is de Handy-Fraag Nr. 1. „Wo büst du graad?“ „Weet ok nich, allens gröön hier buten.“ „Aver du musst doch weten, wo du büst!“ Funklock. „Wat? Ik heff di nich verstahn. Segg doch wat, dammig nochmal.“ Wat denn kümmt, höört sik an as dörch ´n Fleeschwulf dreiht oder na ´n Stroomslag: „Ikikikikikik bbbbüüün“. „Ik verstah gor nix. „Wat hest du seggt? Snack doch maal ordentlich, Herr Gott nochmal!“ „Hiieeeer iiiiis dat grööö nnnn.“ Gröön? Ik heff wedder nix verstahn. Wieso gröön? In’n Snitt bruukt een teihn Minuten, bit du rut hest, dat dien Kolleeg in’t Auto achter di sitten oder op de anner Stratensiet stahn deit mit sien Telefon. Denn warrt opleggt, de Fraag is jo klärt.

Thorsten Börnsen

 

Print Friendly, PDF & Email
KulturportalStiftung Hzgt. LauenburgKulturSommerKontakt