Sowat geiht nich!

Ik bruuk wieder nix as mien Ruh. Ik heff ´n heel un deel sanftmödig Charakter, dor kannst jeedeen na fragen, de mit mi to doon hett. ´N Lamm is dor noch ´n Terrier gegen. Aver wenn se mi blöd kaamt, denn kann ik ok anners. De Navers to’n Bispeel. De stellt ehr Aschemmer in de Middagsstünn an de Straat, aver jümmers bloots denn, wenn ik mi eenmal to Middagstünn henleggen do, wat selten noog vörkümmt. Man wenn ik maal ligg, denn schuuvt se ok ehr Aschemmer an de Straat. Aver, höör to, se doot dat nich, wenn ik mi jüst utplünnen do oder den Wecker op teihn na dree stell, oder wenn ik noch ´n lütt Stremel lesen do. Se sleept ehr elennig Schiettünn nich maal denn an de Straat, wenn ik de Ogen tomaak un so bilütten wegnussel. Nee, so lang höörst‘ keen Mucks vun jüm dröven. Se töövt akraat den Momang af, bet dat ik jüst inslapen bün. Man denn sleept se ehr Schiettünn na baven un laat ehr mit chirurgisch Präzision op dat Plaster ballern. Un twoors in den allereersten Momang vun mien Slaap. ´N Knall is dat denn as en Pistolenschööt. Oder mehr en Explosion: Ja, as wenn dor wat Lüttet in de Luft gahn weer, en Auto oder so. Un wenn du se denn fraagst un to Reed stellst vunwegen den Larm-Anslag, denn seggt se di noch frech in’t Gesicht, dat weer keen Afsicht! Sowat. Sowat kann ik nich af!

Thorsten Börnsen

 

Print Friendly, PDF & Email
KulturportalStiftung Hzgt. LauenburgKulturSommerKontakt