Plattdüütschen Urlaub

Mien Mann un ik hebbt Urlaub maakt. Is´n feinen Urlaub west. Bi söben Daag hebbt wi bloots anderthalv Daag Regenkledage anhat. Ik. Mien Mann harr man en halven Dag sien Regentüch an. He seggt, dor sweet he ümmer so in. Denn is he vun binnen un buten natt un nich blots vun buten. Un denn seggt he ok: „Ik bün doch keen Zuckerpopp!“  De annern Daag weer Sünnenschien. Un windig weer dat ook.  Wi hebbt Inselurlaub maakt, an de Oostsee, up de Insel Usedom. Mit Auto sünd wi hen fohrt, de Fohrrööd harn wi glieks in´t Gepäck. Up de Insel sünd wi denn bloots noch mit Rad fohrt oder mit de Inselbahn. Dor kunnst dat Rad mit rin nehmen, wenn de Weg denn doch to wiet oder to lang oder to steil weer. Ja richtig, to steil, richtige Hügel hebbt de dor up de Insel Usedom mit 16 Perzent Barg an. De Rezeptionistin segg dat all, as wi uns bi ehr ´ne Inselkort köfft hebbt. Dor heff ik mienen Mann vun de Siet ankeken un grient. Över as wi naher ünnerwegens weern, dor wüss ik, wat de Fru an de Rezeption meent harr. Un ümmer wenn man boben weer bi de 16 Perzent Barg an, stünn dor en Schild: „Radfahrer Vorsicht Absteigen!“  Över dat mööt de Usedomer noch liern, dat is doch grad dat Schöne, wenn man sik de 16 Perzent hochquält hett denn up de anner Siet mit Schwung wedder daal to susen. Uns hett dat bannig Spaaß maakt. Dat weer so schön wi plattbars an Strand.

Inge Pusback

Print Friendly, PDF & Email
KulturportalStiftung Hzgt. LauenburgKulturSommerKontakt