Plattdütsch Tähndoktor

Mien Tähndoktor is in Rente gahn. Dat is doch schöön vör em. Över nich vör mi. Man kenn sik, harr doch all allerlei Avenduer miteenanner utstahn, also dental oder seggt wi mal up de Tähn betrocken natürlich. Mien Mann un de Kinner hett he ok behannelt. Dat weer jümmers en Familiendings west no den Tähndoktor hen, de Tähn wiesen: „Ätsch, ik harr man gor keen Lock!“

Un nu stah ik dor, de Kinner sünd sowieso ut Huus, wahnt woanners, hebt dat Söken achter sik oder söökt woanners. Mien Mann is tofreden as dat is. Över ick mutt mi nu en frischen söken. Mit den eenen, dat hett nich passt. Nu weer de nächste Versöök. De hett dat glieks richtig anfungen. Lerst hett se mi laavt, wiel ick so goot putzt harr. Laven deet jo ümmer goot. Hett de Olle ok jümmers maakt. Denn hett se forts  allens nakeeken. Dor weer keen Lock. Nochmal goot.

Un denn fröög se, of ik denn all maal „Prophylaxe“ harr maken laten. Betahlt woll nich de Krankenkass, över is goot un deet good un maakt sik betahlt. Hüüt weer ik dor nu hen. Denn heff ik ok glieks seggt, dat ik dat noch nie nich kennt heff. Un denn hett se mi allens richtig uteneen klamüstert. Is en Wissenschaap för sik. Mit Ultraschall fangt dat an. Dat nächste is Solt. Dat Tüddelband vör de Tähn gehöört ok dorto. Nu ward allens afslepen. Dorna warrt denn noch poliert mit so en extra Politur un an End ward noch so Fluorpast opdragen. Kiekst du denn in Speegel kümmt di glieks „Herrn Pastor sien Koh“ in Kopp: „Un de olle inglisch Miss kreeg een nieges Tähngebiss.“ Nee, nee is dat olle, süht nur so nied ut.

Print Friendly, PDF & Email