Dat nee Notebook

Unser Autor für humorvolle Texte op Platt ist Heinz Tiekötter. Lesen sie hier, was er zum Thema neue Medien erlebte….

Wolfgang wull weeten, wat siene Antje sik to eern söbenzigsten Geburtsdag wünscht. De antert kott un bündig: “Een Notbook“.    „Wat wull du dormit denn anfangen?“  wull he weten? „Du kannst doch gornich mit son Apperot ümgohn. Computer is doch eher wat för Mannslüüd.“  „ Dat kunn een jo leern, wenn man son Ding man eerstmol hett. Learning by dooing!“  geev se n´ lütt beten hoochmeudig trüch.  Antje kreeg so´n Zwergencomputer un weern fortan jümmers mit dat Gerät ingang. Mit de Tiet weer se fixer as Wolfgang mit sien grote Maschien mit veer Gigabyte Arbeitsspieker un all siene velen Programme. Gefulln hett em dat nich jümmers .
Letztens is bi een vun de Fernsehsessel dat Scharnier vun de Schlummerstellung tweibroken. Wolfgang meen, dat weer irreparabel un wull in den suurn Appel bieten un för negenhunnert Euro n´neen keupen. Antje kunn em grood noch stoppen: Se harr in Internet dat Scharnier funnen. Dat hett nichmol twee Euro kost. De Rest weer n´Kinnerspeel för Wolfgang. Gefulln hett em de viegeliensche Vörgohnswies vun Antje nich so recht. Dor is em wat unt de Hannen nohm worrn.
Annermol hett de Gangschaltung vun ehr Fohrrad nich funkschoneert. Wolfgang weer dat to fummelig för siene groten Fingers  un he hett dat ohn Antje to frogen in de Warksteed brocht. As de beiden dat Rad afhoolt hebbt un dat sull 28 € kosten, hett Antje den Montöör froogt, wat dat nich langt harr, dat mit HD 40 intopüstern.  So een Tipp harr se in Internet funnen. De Fohrradhöker hett den Zettel dörchreten. Wolfgang harr ´n roden Kopp.

De beiden sünd Kajakfohrers. Allerlest is de Kamera ünner Woter komen. Antje harr de in de Tasch vun ehren Anorak un hett nich oppasst. Ehr Notebook hett ehr to Siet stohn; se hett leest, dat man een Plastiktüüt mit Reis un den natten Apperot dorin een Woch in de Sünn leggen sall. Dat weer ´n Schangs, dat de denn wieder funkschoneert. Hett klappt.  De Fotohändler harr ehr roden, dat Ding wegtosmieten. Wenn dat ünner Woter komen is, meen he, denn wörr allens nix mehr nützen.
Mittewiel is Wolfgang richtig stolt op siene Fro un dorop, wat de sik jümmers to helpen weet.