Du kannst jo wat beleben………..

Eine neue amüsante Geschichte von unserem Experten in Sachen Plattdüütsch, Heinz Tiekötter aus Börnsen, heißt: "Platt mookt stark".

Genau een Johr is dat heer, dor find ik in mienen Computer een Antiviren-Programm för umsünst. Dat sull nix kosten, ward mi versproken un wenn ik dat rünnerlood, sall ik achterto keen Last mehr hebben mit Viren, Wörms un Spams. Spam, so nennt se Programme, wodörch dien Reekner mit Spijöök un Untüüg infiziert ward. Hunnert Perzent Schutz för Null Euro. Tein Minuten loter harr ik dat Programm rünnerlood. Un alle poor Doog geev dat wedder Norichten mit de neeste Version vun Viren- un Spam-Antibiotika. Nu, een Johr loter, kreeg ik een Reeknung. Un se schrieft op ingelsch. Ik to mienen Nober, he is ´n Mann vun Billung. He öbersett: De Virenjägers schrieft, dat se mit de dottig Euro mien Bankkonto för de Verlängerung vun dat Programm belastet hebbt.
Nodem dat ik mit Atemtechnik mien puterroten Kopp -miene Fro seggt, ik heff nich in Griff- also miene natürliche Farv is wedder trüch, dor roop ik de Viren, ik meen, de mit dat Programm gegen Viren, de roop ik an. Dat weer een verstännige junge Fro op de annere Siet an Klönkasten. De wull erstmol miene Kunnennummer weten. Nu bün ik jo een utslopen Norddütschen. Mi schittst nich so licht an. Ik heff ehr kloormookt, dat dat keen Kunnennummer gifft. Ik weer jo keen Kunnen, ik weer dat Opfer vun een kriminelle Handlung.

Se hett mi denn versproken, dat se dat Geld trüchschicken ward. Un se ward mi dat ook stantepe mailen. Tein Minuten loter harr ik een Schrieben, wedder op ingelsch. Dormit bün ik nochmol to mienen Nober gohn, wegen siene Billung un heff em froogt, wat he mi nochmol verkloorn kunn, wat nu in düt Schrieben steiht. Du, seggt he, dat ook is ingelsch. Dat harr ik ook all rutfunnen. Se schrieft di hier in, dat se di geern as Kunnen beholl´n wüllt. Mehr nich.

Ik wedder trüch. Ut mienen Computer keem grood een wiederet Schreiben vun de sülbige Gesellschop. Op ingelsch. Ik loop dormit nochmol to mien Nober röber. De weer nu grood bien Eten. N´beten genervt drück he mi een Wöörbook D  Düütsch-Ingelsch in de Hann un seggt mi, ik kunn jo all mit dat Öbersetten anfangen. Un he meen, dat öövt fix. As ik dat veertemol  bi em vör de Döör stunn, hett he mi verkloort , dat dat man bloots een Fragebogen west weer. Dormit wull´n de Virenjägers weten, wat ik vun ehrn Sörvis holl. Ik sall jem Schoolnoten för de engelden Frogen verdelen.
Mien Nober meen noch, Schoolnoten weern jo internaschonol. Un ganz ünnen, in dat lütt Finster, door sall ik miene Beweertung rinschrieben. Dat heff ik denn ook mookt: obers op plattdüütsch. Ik heff nämlich ook Billung. Sietdem heff ik nix mehr vun jem heurt. Ik segg jo, Platt is een stark Sprook !