De Fiskalritters

Unser Experte für Texte op Platt, Heinz Tiekötter, hat uns diese Geschichte zur Verfügung gestellt. Viel Spaß beim Lesen…..

In düssen Winter harr de Fähre vun Tollenspieker no Hoopte egentlich dörchfohrn kunnt. Man de Fohrploon ward in Freujohr opstellt un dor weet een jo noch nich, wat dat an Johresenn nich villicht Iesgang op de Elv gifft. Dorüm ward de Bedrief elkeen Johr vun´n 30.November bit anner Johr an  28.Februar instellt.
 
Vör n´poor Johrn  hebbt so´n Räubers in een vun düsse Winterpausen de Dören vun de Fähr opbroken und 550 Liters Dieselöl klaut. Sowat is beus argerlich, ook wenn de Diesel för den Fährmann stüerbegünstigt is, wiel dat he jo Schippfohrt bedrievt. Un mehrstendeels blifft de Geschädigte op den Schoden sitten. He hett jo de Bewiesplicht, dat dor ook würklich 550 Liters in de Tanks bin weern.
Nu hett he ober richtig Pech, wenn denn so´n Fiskalritter op sien tostänniget Finanzamt  -oder as ik jümmers segg:  vun dat Amt för moderne Christenverfolgung- also, wenn de vun düsse Sook heurt. Denn fangt de Arger eerst richtig an. Bi unsen Fährmann meldt sik een Oberinspekter vun düt Amt un wull nu de Differenz  twüschen den stüerbegünstigten Schippsdiesel un den Diesel as för Kraftfohrtügen kassieren. Eerst hett uns Fährmann den Finanzoberschlaumeier froogt, wat he villicht wat smeukt harr, wat em den Kopp n´beten wat dörchenanner bringt.  Dat Finanzamt bliev dorbi; de Fährmann kunn nich bewiesen, dat de, de den Diesel klaut harr, em ook för de stüerbegünstigte Schippfohrt nutzen däe.  Genaus so goot kunn de jo in den Tank vun een LKW infüllt sien. Un dormit weer denn de Grund för de Stüerbe-günstigung Schippfohrt wegfullen.
Na kloor, dat de Fährmann bewiesen kunn, wokeen em beklaut harr; dor leeg jo keen Visitenkoort an´n Tatort. He hett denn anfeuhrt, dat dat wohrschienlich veel lichter is, mit een Schipp langsiet de Fähr to gohn un aftopumpen,  as den Diesel in 20 ltr-Kanister an Land to dregen. De Stüeroberinspekter meen bloots, angohn kunn allens un bewiesen kunn de Fährmann nix.  Nu güng de Angelegenheit vör Gericht un an Enn bleev uns Fährmann ook noch op de Gerichts- un Anwaltskosten sitten.
Miene Fro hett vör Johrn een lütte Schippswarft arvt.  Ünner de Fohrtügen geev dat ook ´n Mastenwogen. Dormit sünd de Riggs vun un no de Schepen transportiert worrn. Düsse Mastenwogen is uns klaut worrn. Wi hebbt ´n Anzeige op de Polizei-Wach mookt un de hebbt den Wogen to Fahndung utschreben. Man he weer weg un keem nich trüch. He weer wull lang in´n Osten. Ene Kopie vun de Anzeige güng to dat Verkehrsamt. Dormit weer dat Fohrtüüg afmeldt. Du gläuvst mi nich, wat denn passiert is: Wi kregen een Mahnung vun dat Amt för Verkehrsstüern. Wi sullen de fällige Anhänger-Stüer betolen. Unsen Inwand, dat de Wogen doch klaut weer un jem de Anzeige vörliggt, hett dat Amt  nich anerkannt. Wi kunnen jo nich bewiesen, dat uns Mastenwogen nu nich mehr öber bundesdütsche Stroten fohrn däe. Un op unse Stroten fohrn, dat kost nu mol Stüern!  Un dorüm  harrn wi de to betolen, bit dat de Deev sik bit dat Amt mellen deiht.
Kiek, sowat nennt sik Obrigkeit. Dor bruukst du ´n Amt un keen Verstand.