Thorsten Börnsen is de niege Baas

Dat geiht wieder mit dat Plattdüütschzentrum in Holsteen. Börnsen hett dat Leit vun Volker Holm övernahmen.

Von Volker Holm

Mölln –  Nu is dat amtlich: Dat Plattdüütschzentrum in Holsteen hett en niegen Baas. An’n 4. Januar is he al in sien Amt inföhrt worrn. Thorsten Börnsen hett dat Leit för dat „Zentrum für Niederdeutsch im Landesteil Holstein“ (Plattdüütschzentrum in Holsteen) vun Volker Holm övernahmen. Un nu is em ok allens övergeven worrn – meist allens.
Dat geiht wieder mit dat Plattdüütschzentrum in Holsteen: He wiest de Lüüd dat Hamborger Rathuus, föhrt jüm dörch de Hamborger Altstadt un hett dorför ok en Book, en Stadtföhrer op Platt rutbröcht. Bi den plattdüütschen Musikwettbewarb för junge Lüüd, den Plattsounds-Wettstriet, hett he düchtig bi de Organisatschoon mitmaakt. Utwussen Lüüd hett he Plattdüütsch bibröcht bi de VHS.
Un in de letzten Jahren weer he düchtig togangen bi dat Ev. Bildungszentrum Hermannsburg in Neddersassen mit egen Projekten. Nu schall he Plattdüütsch in Sleswig-Holsteen vöranbringen. En Barg Arbeid luurt op em: Dat Land hett jüst den Handlungsplan Sprakenpolitik beslaten. Dor gifft’t bannig wat to doon: 29 Scholen in’t Land sünd nu Modellscholen un as dull an’t Plattdüütschleern. De schöllt Hölp kregen. Un ok bi de ganz Lütten in de KITAs un KIGAs lett sik noch wat in Gangen setten. Ok de Ollen un Kranken töövt al: Plattdüütsch in de Pleeg is heel wichtig. Un ok plattdüütsche Kulturpleeg is en Thema. – Gifft’t veel to doon!
Toeerst aver mutt sik de niege Baas vun’t Plattdüütschzentrum inrichten: Sien niege Arbeitsplatz schall de Stadthauptmannshoff in Mölln ween – un dor ward nu düchtig ümbuut. Dat duert sachs en Stoot! Wi wünscht Thorsten Börnsen allens Gode för siene niegen Opgaven!