Aus der Reihe "In uns Dörp"

Vergnügliches op Platt hat unser Autor Heinz Tiekötter für das Kulturportal geschrieben. Lesen Sie hier was es da alles zu erleben gibt…..

Von Heinz Tiekötter
Swattloh-Kaninken
Weerst  du mol ton Eten vun  Leni un Ernst  Pohl inlood ?  Ik jo !  Ninich heff ik annerswo  so scheunet  Geschirr sehn as bi de beiden. Wenn Leni opdeckt, is dat jümmers spannend, welke Töllers  dütmol vör di stoht un ut welk Sülverpokool hüüt  drunken ward.  Is dat de Hamborger Senotspries 1972  orrer de Ehrenpries vun dat Land Holsteen. Wenn een so as Ernst sien Geschäft versteiht, denn ward he mit Pokalen, Urkunnen un Sülvertöllers öberschütt. Ernst  is Kaninkentüchter.
Wat  Ernst mit siene Kanickels an Priesen to Huus bringt, dat kannst di nich vörstellen. Ernst hett in sien Kaninkenstall  jümmers twintig bit dottig Swattlohe. Un dat sünd allens Siegertypen ;  wat heten  deit , dat elkeen vun de Derten tominds 95 Punkte op een Utstellung wunnen hett.  Schafft een vun siene Stallhosen dat nich, denn kannst seker sien, dat dat an Sünndag no de Utstellung Kanickelbroden bi Ernst un Leni gifft.
Ernst hett siene Kaninken dull in Griff un se hebbt Respekt vör em. He trainiert se ok Dag för Dag. Wenn he mit jem to een Utstellung reist, üm nee Priesen intosammeln, denn kümmt  allens  dorop an, dat se vör de Jury ´n goden Indruck mookt. Dat funkschoneert blots, wenn se nicht to swor sünd, sik keen witte Hoorbüschel  in de swatte Deek verirrt hett un se stantepe in een orrnlich Posituur jumpt, wenn dor een in den Käfig rinkiekt, de een Kontrullblock in de Hann hett. So as de Rekruten bien Appell, wenn jem de Spieß mustert.
Dat mit de Hoorbüschel  kriggt Ernst hen, indem he siene Kaninken mit een Pinzette de witten Hoor rutritt. De Posituur schaffen se tosomen: Ernst treckt jem denn orrnlich an de Löffel in de Heugte un haut jem achtern op den Moors.  Man bi toveel Gewicht  duert dat länger: Ernst mookt denn  Geschwisterpoorung. De tokomen Wurf ward denn  lütter un liggt mit dat Gewicht wedder ünner dree Kilo. Un de ole Zipp or de Rammler koomt in de Pann.
Wenn ik Ernst beseuk un kiek in den Stall, hebbt  de Kaninken mi nich op´n Zettel un mookt dormit wieder, wo se grod bi weern. Seht se Ernst rinkomen, denn nehmt se Hollung an.  Man opstellen in Reih un Glied köönt se noch nich. Doran  euvt Ernst opstunns mit jem.