Heinz Tiekötter vertellt…

Mit dem Text: "Se leevt noch" amüsiert unser Autor op Platt mit einer neuen Geschichte (nicht nur) die Freunde der niederdeutschen Sprache.

Du kannst jo wat beleben    
Rudolf Rausberg  weer ´n Paster vun´n olen Slag, as wi de vun freuher kennt.  He  keem as Prediger  ohne Mikrofon un Luudsprekers ut. In de achterste Reeg vun de Kark kunnst em noch goot verstohn. Meist twee Meter groot un dütlich öber tweehunnert Pund swoor,  weer he för siene Gemeende n´echten Lüchtorn. Paster Rausberg siene  Kark weer jümmers goot besöcht un wat he in siene Predigten  öber dat Leben un dat Mittenanner  vun uns Minschen to seggen harr, dat hett de Lüüd toheurn loten. Un wenn Paster Rausberg mol mit een schimpt hett, denn harr dat Wirkung. De holl ´n Tietlang den Sünder op´n groden Weg.  Rausberg weer volkstümlich un oftens keem he no´n Gottesdeenst  noch mit op´n Karkensnaps  in den Kroog.

Un ok siene Truerfiern  harrn dat in sik. Rausberg hett siene Schoopn kennt un leeg allermeist richtig mit sien Wöör. Ninich war ik vergeten, as wi Peter Brumm siene Manda dat leste Geleit geben hebbt.  As dat bi uns Paster gang un geev weer, hett he Manda´s Leben nochmol  afrullen loten. Denn hett mit siene  kraftvulle Bassstimm to´n Afscheed een Leed anstimmt un achterno sünd  wi rut ut de Kark un in den hellen Sünn-schien. In en lange Reeg gungen wi achter uns Paster  un den Sarg  to de  Graffsteed vun de Familje Brumm.
En lest lütt Gebet un den geev Paster Rausberg de Trägers dat Teken, se sullen nu den Sarg sinnig doolloten. Mitn´mol stött Peter Brumm den Paster in de Siet un wies dool in dat Graff. Rausberg  keek verwunnert un  seh dor ünnen in de Kuhl ´n Rott  hen un her lopen. Villicht weer se kott vörher dor dool fulln un  keem  so gau nich wedder rut. „Stopp“ reep Paster Rausberg mit scharpe Kommandostimm, ehe dat de Sarg ünnen opsetten kunn.  Weer dat de Sorge üm dat Deert orrer hett he dacht, dat Manda un de Rott nich tosomen in ene Kuhl geheurten?  Rausberg sien neegstet Kommando  keem stantepe: „Wedder hooch mit den Sarg!“  Un denn keeken  he un Peter Brumm besorgt dool. Harr de Rott ünnern den Sarg Schoden nomen or harr se öberleevt?
Den beiden full een Steen vun Harten as se sehn, dat dat Deert jümmers  noch hen un her leep un Paster Rausberg schree erlichtert op: „Se leevt  noch!“  De Lüüd, de wieder achtern in de Reeg allns heurt ober sünst nix  mitkregen harrn,  keken no boben to´n Heben un fungen an, sik to bekrüzigen.