Dat Ozonlock

Nu mutt ik woll nich verkloren, wat dat mit dat Ozonlock op sik hett, dat steiht jo all Nees lang in de Daagbläder. Un in’t Radio un in de Flimmerkist höörst und sühst du meist nix anneret. De Warms vun uns Eerd ward jümmers grötter, un dat schall nich goot sien, seggen de Experten un de, de sik dorför hoolt.

De Oorsaak sünd Afgasen, an de wi all schullig sünd, afsünnerlich de Fabriken un natüürlich wi Autofohrers. Kannst du jo bald en slechtet Geweten kriegen!

Nu heff ik aver wat leest, do kannst du di blots an de Kopp faten! In Däänmark, also gor nich wiet weg vun uns, schölen de Köh en speziellet Foder ut Schottland kregen, dormit se nich so veel opstöten un pupen doot. De twee Millionen Köh in uns Naverland produzeert so veel Methangas – in een Johr schölen dat hunnertunveertigdusend Tünnen sien –, dat dat Ozonlock dordörch jümmers grötter ward un so to de Warms bidragen doot! Nu kümmst du!

Ik kann mi erinnern, dat vör en poor Johren al en Artikel över datsülve Thema in mien Daagblatt stunn. Do weer aver de Reed vun dat Rindveeh in Australien, man dat Problem weer datsülve. Ok dormols harr man utrekent, dat ut de Köh un de Ossen so veel Gas utströmt, dat dat Ozonlock över de Antarktis jümmers grötter ward!

Wenn dat al tweemol in de Daagbläder steiht, mutt dat woll wohr sien. Un uns arme Autofohrers, de egalweg melkt un schröppt ward, vertellt de Politikers, dat wi mehrstendeels an de globale Warms schüllig sünd! De Stüer ward düerer, de Versekern al so, un eerst de Spriet!! Wi schölen nich mehr so veel fohren,wi schölen an de Ümwelt denken – man dorbi denkt disse Politikers nich an uns Natuur, blots an uns Geldbüdel! Kannst jo meist ok nich mehr wiet fohren, Benzin is al en Luxusartikel.

Un wenn dat mit de Warms so wieder geiht, ward se uns sachts noch dat Autofohren an männiche Daag verbeden, as wi dat al mol beleevt harrn. Kannst du di erinnern? Dormols, dat weer anno 1973, harrn uns de Scheichs de Hohn afdreiht un dat Öl weer knapp. Du dörvst an Sünndaag nich fohren, wenn du keen Utnahmegenehmigung harrst. Ik harr een, aver dat Fohren op de leddige Autobahn hett keen Spaaß maakt – mudderseelenalleen fohrst du dien dusend Kilometers un hest di al op en Kontroll dörch de Polizei freut. Man nich eenmol harrn se mi kontrolleert, dat weer bannig langwielig!

Bevor dat nu wedder so wiet is, schöölt se man toeerst dat Problem mit dat Opstööten un Puupsen vun dat Rindveeh in de heel Welt angahn. Blots wiel de mit ehr Verdauung Methangas utscheden, mööt wi woll nich wedder to Foot gahn! Ik op jeden Fall heff keen Lust dorto, ok wenn de Politikers meent, mit uns Autofohrers köönt se dat jo maken.

Manfred A. Sahm